粤剧奇伶靓少佳

有一个粤剧老倌,佢嘅行事方式与众不同,好多人讲起佢都话佢好怪好特别,于是佢就畀行内人叫做“奇伶”嘞——佢就系靓少佳。

靓少佳有几奇呢?睇下就知:

佢唔钟意畀人“封王”。演戏嘅凡畀人称之为王,是最光荣不过嘅事,乜嘢“泰斗”呀,“状元”呀,系求之不得嘅事。曾有某报替靓少佳加冕,尊佢为“小武王”,但系佢睇咗之后好唔高兴,话:“演戏嘅不该称王称霸,我只系一个粤剧小武。”你道奇也不奇?

佢唔钟意写“领衔”。从艺六十几年来,虽然系剧团第一主角,但从未搞乜野“领衔主演”,佢话唔钟意将自己嘅名横放喺其他演员个名上面。你道奇也不奇?

佢钟意“让戏”。戏份,从来系演员必争之地。而靓少佳却反其道而行,将最主要嘅戏份,让畀同辈同后辈担纲,让佢地从知名更知名,从陌生变为饮誉。喺寸戏必争嘅舞台上,居然仲有人肯为人哋创造出名机会,你道奇也不奇?

佢唔钟意讲嘢。日常生活中,佢可以成日唔讲一句话。同行背后都叫佢做“鼓气佬”,佢喺后台眼睛成日闭住,化妆间嘅灯亦唔开,人哋有事问他,佢总是有气无力噉回答,似一只有重病嘅猫。之但系佢一出台,双目炯炯有神,变成一只活生生嘅老虎,一唱霸腔,其声震撼屋瓦,你道奇也不奇?

呢个奇人靓少佳(1907-1982),原名谭少佳,系南海平洲人。幼年随父亲谭杰南喺新加坡学戏。曾喺人寿年、胜寿年等大班担任正印小武达二十余年。喺省港澳以及美国、东南亚均享有声誉。靓少佳嘅表演艺术熔冶南、北于一炉,尤善于武戏文做,长靠、短打、蟒袍、官衣等行当均能胜任。靓少佳喺舞台塑造咗好多艺术形象,其中《西河会》嘅赵英强,《拦江截斗》嘅赵云,《夜战马超》嘅马超等尤为同行及观众所称道。

靓少佳基本功深厚扎实,身段动作刚健利索,善于喺传统嘅基础上进行革新。好似《西河会》,传统演出嘅处理系:主角赵英强用[大地锦]锣鼓出场,念一段口白交代家庭变故同要去救妻等事。靓少佳觉得口白唔够气氛,改用[披星头]锣鼓出场,先“跳大架”,再用一段[披星]牌子连唱带做,边唱边做身段:“坡星,带月过西河将妻会”。咁样比起传统表演无论音乐性、舞蹈性都大大加强,赵英强嘅形象亦更加威武,舞台气氛亦更加强烈,观众睇起嚟亦大过戏瘾嘞!