怀念陈剑声老师

一般反串嘅女文武生，做起戏嚟都会好秀气，脂粉味重，之但系有一个香港嘅女文武生，佢装起身嚟刚阳威武，一开声雄壮有力，一啲都睇唔出系女扮男装，佢就系行内公认嘅无脂粉味嘅老倌陈剑声嘞。

陈剑声，原名陈杏葵，江门外海人，系当代粤剧界一位出色嘅女文武生。佢自幼醉心粤剧艺术，喺求学时期已开始学粤剧。初期跟谭珊珊、刘永全学粤剧，再师从马玉琪、朱庆祥、叶少兰、王小玲、卢轼、许君汉、韩燕明学艺，慈善伶王“新马师曾”收佢为入室弟子，直传技艺。陈剑声1997—2007年任香港八和会馆主席，成为该馆成立以来最年轻嘅主席。陈剑声功夫扎实，个性爽朗，佢演英雄豪杰，才子将相都好有说服力，戏迷都话，睇佢演出系件赏心悦目嘅事。佢嘅作表作有：《淝水之战》、《六月雪》、《楚汉争》、《吴越春秋》、《烽火擎天柱》、《一剑双鞭碎海棠》、等大戏。

点解呢个女仔做戏咁有刚阳之气呢？原来，陈剑声佢入行之前曾经系女子足球队员，运动员艰苦嘅训练生涯，练就咗佢干练豪爽嘅性格，佢近一米七嘅高个头，着起戏服威风凛凛，佢有一种气场，不怒自威，平时佢唔系咁钟意笑，但佢系外冷内热嘅性格，开心时佢都会滔滔不绝，妙语联珠。仲有佢嘅生日疍糕系全行老倌中最大嘅的，因好多戏迷钟意佢嘅性格，疍糕每年加一磅，戏迷支持咗佢十几年，疍糕就越嚟越大嘞。

陈剑声演《六月雪》，佢跟住锣鼓点打马上场亮相，唱“御笔亲题黄金榜，春风得意好还乡，马上扬鞭把龙驹赶。”一轮圆场再转身执马鞭勒马。再唱“忽然间雪拥蓝关马蹄寒，炎炎六月飞霜降，定有奇冤雪下藏，明传县令暗查访”。边唱边做关目，一连串唱做，声音宏亮雄壮，男性化嘅动作瀟洒刚劲，充满魅力，吸引住戏迷嘅眼球，搏得戏迷唔停嘅喝采声，唔怪得大家都钟意呢个无脂粉味嘅老倌啦。

（喜欢我李池湘公众号的内容吗？欢迎转发，请叫朋友关注我好吗？谢谢您！）