芳艳芬的“芳腔”

“云想衣裳花想容，春花万紫与千红……”呢段音韵悠扬嘅《红鸾喜》唱腔，充分发挥鼻腔共鸣，腔调圆润雅淡，感情丰富，温婉柔和———呢种粤剧嘅腔口就叫做“芳腔”嘞。

上世纪50年代，香港有一个花旦，演技高超，人靓声甜，大受戏迷爱戴。佢一演戏，后台就会摆满戏迷送嘅鲜花同埋人参汤、鸡汤、冰糖燕窝等礼物嘎嘞。1953年，佢先至25岁，就演咗60几部大戏，主演咗150部电影，畀香港戏迷评选为“粤剧花旦王”。至犀利嘅系，佢创立咗一个独特嘅唱腔———芳腔。呢个咁叻嘅花旦就叫芳艳芬嘞。

芳艳芬真名叫梁燕芳，出生喺广东恩平县。因为养母系戏迷，燕芳就对粤剧产生咗兴趣，后来拜粤剧前辈王九做开山师父，推荐佢到戏班学戏，由音乐家易剑泉同佢改个艺名“芳艳芬”。初踏台板，佢重同红线女一齐做过《六国大封相》嘅提灯宫女，13岁开始做二花，几年后升做正印花旦。芳艳芬16岁嗰年，佢喺广州大龙凤剧团演出，以一曲《夜祭雷峰塔》成名。佢嘅成名戏重有《红鸾喜》、《洛神》、《窦娥冤》、《火网梵宫十四年》等。佢自创嘅《反线二王》腔，盛极一时，“芳腔”亦开始得到行内外人嘅承认，广为流行。

芳艳芬嘅性格好温和，人缘极好。人哋话，老倌唱嘢声如其人，佢嘅声音好甜美，好娇柔，所以佢嘅唱腔亦系好柔软，好似莺声婉转噉样。喺《红鸾喜》入边嘅“二王”腔：“一曲玉琵琶，奏出阳春白雪，飘飘仙乐，乐无穷……”唱到“乐无穷”个尾腔嘅时候，佢用鼻颚发声，用鼻腔哼咗两个温柔嘅滑音，令人听嚟如饮醇酒，如沐春风；接落嚟：“人说只羡鸳鸯不羡仙，人人都说神仙好，由来空即是色呀，色即是空。”芳艳芬嘅呢段“芳腔”，甜美娇柔，佢独特嘅气息声，令人好似听紧一位温柔美女喺你耳边轻吟浅唱，令你回味无穷。呢个就系“芳腔”受人欢迎嘅原因嘞。

你话，“温柔”边个会抗拒呢？呢啲就系“芳腔”嘅魅力喇。